കോട്ടയം: കുറിച്ചിയിൽ ജില്ലാ പോലീസിന്റെ വൻ കഞ്ചാവ് വേട്ട.
കുറിച്ചി പൊൻപുഴ പൊക്കം റോഡരികിൽ നിന്നും നാലുകിലോ കഞ്ചാവുമായി നാല് ഇതരസംസ്ഥാന തൊഴിലാളികളെയാണ് കോട്ടയം ചിങ്ങവനം പോലീസും ജില്ലാ പോലീസ് മേധാവിയുടെ ലഹരി വിരുദ്ധ സംഘവും ചേർന്ന് പിടികൂടിയത്.
ശനിയാഴ്ച രാവിലെയായിരുന്നു സംഭവം. പൊൻപുഴ പൊക്കത്തിലെ വ്യവസായ മേഖല കേന്ദ്രീകരിച്ച് ജോലി ചെയ്യുന്ന ഇതരസംസ്ഥാന തൊഴിലാളികൾ വ്യാപകമായി കഞ്ചാവ് വിൽപ്പന നടത്തുന്നതായി ജില്ലാ പോലീസ് മേധാവിയുടെ ലഹരി വിരുദ്ധ സ്ക്വാഡിന് വിവരം ലഭിച്ചിരുന്നു.
ഇതേ തുടർന്ന് പോലീസ് സംഘം പ്രദേശത്ത് നിരീക്ഷണം നടത്തുകയായിരുന്നു. ഈ സമയത്താണ് കഞ്ചാവുമായി ഇതരസംസ്ഥാന തൊഴിലാളികളായ നാലുപേർ സ്ഥലത്ത് എത്തിയത്. തുടർന്ന് ഇവരെ കസ്റ്റഡിയിൽ എടുത്ത് നടത്തിയ പരിശോധനയിലാണ് നാലു കിലോ കഞ്ചാവ് കണ്ടെത്തിയത്. പ്രദേശത്ത് പോലീസ് പരിശോധന തുടരുകയാണ്.
