ചെന്നൈ: വടക്കൻ ചെന്നൈ തെർമൽ പവർ സ്റ്റേഷന്റെ (എന്നൂർ) നിർമ്മാണ സ്ഥലത്തുണ്ടായ അപകടത്തിൽ 9 തൊഴിലാളികൾ മരിച്ചു. നിർമ്മാണത്തിലിരുന്ന ഒരു കമാനം തകർന്നുവീഴുകയായിരുന്നു. അഞ്ച് പേർക്ക് പരിക്കേൽക്കുകയും ചെയ്തു.പ്രാഥമിക റിപ്പോർട്ടുകൾ പ്രകാരം, ഏകദേശം 30 അടി ഉയരത്തിൽ നിന്ന് വീണ കമാനം ഇതരസംസ്ഥാന തൊഴിലാളികളുടെ മേൽ പതിക്കുകയായിരുന്നു. നിരവധി തൊഴിലാളികൾ അവശിഷ്ടങ്ങൾക്കിടയിൽ കുടുങ്ങിപ്പോയി. വളരെ പ്രയാസപ്പെട്ടാണ് അവരെ രക്ഷപ്പെടുത്തിയത്.
ഒരു തൊഴിലാളിയുടെ നില ഗുരുതരമാണെന്നും പത്തിലധികം പേർക്ക് ഗുരുതരമായി പരിക്കേറ്റതായും വൃത്തങ്ങൾ അറിയിച്ചു. പരിക്കേറ്റ എല്ലാവരെയും ഉടൻ തന്നെ വടക്കൻ ചെന്നൈയിലെ സ്റ്റാൻലി സർക്കാർ ആശുപത്രിയിൽ പ്രവേശിപ്പിച്ചു.
പോലീസും ഭരണകൂടവും ദുരിതാശ്വാസ, രക്ഷാപ്രവർത്തനങ്ങൾ ആരംഭിച്ചിട്ടുണ്ട്. അപകടകാരണം അന്വേഷിക്കാൻ ഉത്തരവിട്ടിട്ടുണ്ട്. അശ്രദ്ധ കണ്ടെത്തിയാൽ കരാറുകാരനും ബന്ധപ്പെട്ട ഉദ്യോഗസ്ഥർക്കും എതിരെ കർശന നടപടി സ്വീകരിക്കുമെന്ന് പ്രാദേശിക ഭരണകൂടം പറയുന്നു.
അപകടത്തിന്റെ കൃത്യമായ കാരണം ഇതുവരെ കണ്ടെത്താനായിട്ടില്ലെന്ന് ആവഡി പോലീസ് കമ്മീഷണറേറ്റ് അറിയിച്ചു. രക്ഷാപ്രവർത്തനങ്ങൾ പുരോഗമിക്കുകയാണെന്നും സംഭവത്തിൽ അന്വേഷണം ആരംഭിച്ചതായും അറിയിച്ചു.
തമിഴ്നാട് വൈദ്യുതി ബോർഡ് സെക്രട്ടറിയും തമിഴ്നാട് ജനറേഷൻ ആൻഡ് ഡിസ്ട്രിബ്യൂഷൻ കോർപ്പറേഷൻ ലിമിറ്റഡ് (TANGEDCO) ചെയർമാനുമായ ഡോ. ജെ രാധാകൃഷ്ണൻ, പരിക്കേറ്റ തൊഴിലാളികളെ കാണാനും സ്ഥിതിഗതികൾ വിലയിരുത്താനും സ്റ്റാൻലി സർക്കാർ ആശുപത്രി സന്ദർശിച്ചു.
