ഡൽഹി: റാഫേൽ യുദ്ധവിമാനത്തിൽ പറന്ന് രാഷ്ട്രപതി ദ്രൗപതി മുർമു. റാഫേൽ യുദ്ധവിമാനത്തിൽ പറക്കുന്ന ഇന്ത്യയുടെ ആദ്യത്തെ രാഷ്ട്രപതിയാണ് ദ്രൗപതി മുർമു. ഹരിയാനയിലെ അംബാലയിലെ വ്യോമസേനാ താവളത്തിൽ നിന്നാണ് രാഷ്ട്രപതിയെയും വഹിച്ച് യുദ്ധവിമാനം ആകാശത്തേയ്ക്ക് പറന്നുയർന്നത്.
പഹൽഗാം ഭീകരാക്രമണത്തിനു മറുപടിയായി ഇന്ത്യ പാക്കിസ്ഥാനിൽ നടത്തിയ ഓപ്പറേഷൻ സിന്ദൂരിൽ നിര്ണായക പങ്കുവഹിച്ച യുദ്ധവിമാനമാണ് റാഫേൽ. യുദ്ധവിമാനത്തിൽ പ്രവേശിക്കുന്നതിനു മുന്നോടിയായി സൺഗ്ലാസ് ധരിച്ച് കൈയ്യിൽ ഹെൽമെറ്റ് പിടിച്ചു നിൽക്കുന്ന രാഷ്ട്രപതിയുടെ ചിത്രങ്ങൾ പുറത്തുവന്നിരുന്നു.
പറന്ന് ഉയരുന്നതിനു മുന്നോടിയായി വിമാനത്തിനുള്ളിൽ ഇരുന്ന് കൈവീശി ആളുകളെ അഭിവാദ്യം ചെയ്യുന്ന രാഷ്ട്രപതിയുടെ ദൃശ്യങ്ങളും പുറത്തു വന്നിട്ടുണ്ട്.
രാഷ്ട്രപതി ദ്രൗപതി മുർമു യുദ്ധവിമാനത്തിൽ പറക്കുന്നത് ഇതാദ്യമല്ല. 2023 ഏപ്രിൽ 8 ന്, അസമിലെ തേസ്പൂർ വ്യോമസേനാ സ്റ്റേഷനിൽ വെച്ച് രാഷ്ട്രപതി സുഖോയ് 30 എംകെഐ യുദ്ധവിമാനത്തിൽ യാത്ര ചെയ്തിരുന്നു. ഈ യുദ്ധവിമാനത്തിൽ പറക്കുന്ന മൂന്നാമത്തെ രാഷ്ട്രപതിയും രണ്ടാമത്തെ വനിതാ രാഷ്ട്രപതിയും ദ്രൗപതി മുർമു ആണ്.
