മലയാളത്തിന്റെ അക്ഷരകുലപതി എം.ടി. വാസുദേവൻ നായരുടെ മാസ്റ്റർപീസ് കൃതി ‘രണ്ടാമൂഴം’ സിനിമയാകുന്നു. എം.ടിയുടെ മകൾ അശ്വതി വി. നായരാണ് പിതാവിന്റെ വലിയ സ്വപ്നമായിരുന്ന ഈ പ്രോജക്റ്റിനെക്കുറിച്ചുള്ള വിവരങ്ങൾ പങ്കുവെച്ചത്. ചിത്രത്തിന്റെ ഔദ്യോഗിക പ്രഖ്യാപനം 2026-ൽ ഉണ്ടാകുമെന്നും അവർ വ്യക്തമാക്കി.
ഇന്ത്യൻ സിനിമയിലെ തന്നെ വലിയ താരനിര അണിനിരക്കുന്ന ചിത്രമായിരിക്കും ‘രണ്ടാമൂഴം’ എന്ന് അശ്വതി പറഞ്ഞു . ചിത്രത്തിന്റെ ഫസ്റ്റ് ലുക്ക് പോസ്റ്റർ വൈകാതെ തന്നെ പുറത്തുവിടുമെന്നാണ് സൂചന.
എം.ടി. തയ്യാറാക്കിയ തിരക്കഥകളിൽ രണ്ടാമൂഴത്തിനാണ് താൻ പ്രഥമ പരിഗണന നൽകുന്നതെന്ന് അശ്വതി കൂട്ടിച്ചേർത്തു . പിതാവിന്റെ ആഗ്രഹം സാക്ഷാത്കരിക്കുക എന്നത് തന്റെ ലക്ഷ്യമാണെന്നും അവർ പറഞ്ഞു.
മഹാഭാരത കഥയെ ഭീമന്റെ കാഴ്ചപ്പാടിലൂടെ അവതരിപ്പിക്കുന്ന ‘രണ്ടാമൂഴം’ സിനിമയാക്കാൻ മുൻപ് പല പ്രമുഖ സംവിധായകരും ശ്രമിച്ചിരുന്നെങ്കിലും സാങ്കേതികമായ കാരണങ്ങളാൽ അവ നീണ്ടുപോവുകയായിരുന്നു. ഇപ്പോൾ എല്ലാ തടസ്സങ്ങളും നീങ്ങി സിനിമയായി മാറാൻ ഒരുങ്ങുകയാണ്.
