തിരുവനന്തപുരം: എസ്എന്ഡിപി യോഗം ജനറല് സെക്രട്ടറി വെള്ളപ്പള്ളി നടേശനെ പിന്തുണച്ച് എന്എസ്എസ് ജനറല് സെക്രട്ടറി സുകുമാരന് നായർ. ഇത്രയും വില കുറഞ്ഞ രീതിയില് ഒരു സമുദായ നേതാവിനെ ആക്ഷേപിക്കുന്നത് ശരിയല്ലെന്ന് അദ്ദേഹം വ്യക്തമാക്കി.
ഇരുസമുദായ സംഘടനകളും സഹകരിച്ച് മുന്നോട്ട് പോകേണ്ട സാഹചര്യമാണെന്ന വെള്ളാപ്പള്ളി നടേശന്റെ പ്രസ്താവനയുടെ പശ്ചാത്തലത്തില് റിപ്പോർട്ടർ ടിവിയോട് പ്രതികരിക്കുകയായിരുന്നു എന്എസ്എസ് ജനറല് സെക്രട്ടറി സുകുമാരന് നായർ.
എന്എസ്എസിന് രാഷ്ട്രീയപരമായി എല്ലാവരോടും ഒരേ സമീപനമാണ്. വെള്ളപ്പള്ളി നടേശന് ദീർഘകാലമായി ഒരു സമുദായത്തിന്റെ നേതാവാണ്. ഇത്രയും പ്രായമായ അദ്ദേഹത്തെ പോലൊരു നേതാവിനെ ഈ തരത്തില് വില കുറഞ്ഞ രീതിയില് രാഷ്ട്രീയ നേതാക്കള് ആക്ഷേപിക്കുന്നത് ഒരിക്കലും ഭൂഷണമായ കാര്യമല്ല.’ ജി സുകുമാരന് നായർ പറഞ്ഞു.
അതേസമയം, എന്എസ്എസിനേയും എസ്എന്ഡിപിയേയും തമ്മില് തെറ്റിച്ചത് പ്രതിപക്ഷ നേതാവ് വിഡി സതീശന് ആണെന്ന വെള്ളാപ്പള്ളി നടേശേന്റെ പ്രസ്താവനയോട് പ്രതികരിക്കാന് അദ്ദേഹം തയ്യാറായില്ല.
