ന്യൂഡൽഹി: അസമിൽ പരിശീലന പറക്കലിനിടെ വ്യോമസേനയുടെ സുഖോയ്-30 എം.കെ.ഐ യുദ്ധവിമാനം തകർന്നുണ്ടായ അപകടത്തിൽ രണ്ട് പൈലറ്റുമാർ വീരമൃത്യു വരിച്ചു. സ്ക്വാഡ്രൺ ലീഡർ അനുജ്, ഫ്ലൈറ്റ് ലെഫ്റ്റനന്റ് പുർവേഷ് ദുരാഗ്കർ എന്നിവരാണ് മരിച്ചത്. ജോർഹട്ട് എയർഫോഴ്സ് സ്റ്റേഷനിൽ നിന്ന് വ്യാഴാഴ്ച വൈകുന്നേരം പരിശീലനത്തിനായി പറന്നുയർന്ന വിമാനം, രാത്രി 7.42-ഓടെയാണ് അപ്രത്യക്ഷമായത്. ജോർഹട്ടിൽ നിന്ന് ഏകദേശം 60 കിലോമീറ്റർ അകലെ കർബി ആംഗ്ലോങ് ജില്ലയിലെ മലനിരകളിലാണ് വിമാനം തകർന്നുവീണത്.
വിമാനം അപ്രത്യക്ഷമായെന്ന വിവരം ലഭിച്ചയുടൻ തന്നെ വ്യോമസേന തിരച്ചിൽ നടപടികൾ ആരംഭിച്ചിരുന്നു. എന്നാൽ പ്രതികൂലമായ ഭൂപ്രകൃതിയും വനമേഖലയുമായതിനാൽ രക്ഷാപ്രവർത്തനം ദുഷ്കരമായിരുന്നു. പിന്നീട് നടന്ന തിരച്ചിലിലാണ് വിമാനത്തിന്റെ അവശിഷ്ടങ്ങളും പൈലറ്റുമാരുടെ മൃതദേഹങ്ങളും കണ്ടെത്തിയത്.
ഇന്നു രാവിലെയാണ് ഇന്ത്യൻ വ്യോമസേന പൈലറ്റുമാരുടെ മരണം ഔദ്യോഗികമായി സ്ഥിരീകരിച്ചത്. സ്ക്വാഡ്രൺ ലീഡർ അനുജിന്റെയും ഫ്ലൈറ്റ് ലെഫ്റ്റനന്റ് പുർവേഷ് ദുരാഗ്കറിന്റെയും വിയോഗം സേനയ്ക്ക് വലിയ നഷ്ടമാണെന്നും, അവരുടെ കുടുംബാംഗങ്ങളെ ഈ ദുഃഖസമയത്ത് പിന്തുണയ്ക്കുമെന്നും വ്യോമസേന എക്സിൽ കുറിച്ചു.
സുഖോയ്-30 എം.കെ.ഐ ഇന്ത്യൻ വ്യോമസേനയുടെ കരുത്തരായ യുദ്ധവിമാനങ്ങളിൽ ഒന്നാണ്. ഇത്തരം പരിശീലന പറക്കലുകൾ പതിവാണെങ്കിലും, മോശം കാലാവസ്ഥയോ സാങ്കേതിക തകരാറുകളോ ആകാം അപകടത്തിന് കാരണമെന്നാണ് പ്രാഥമിക നിഗമനം.
About the Author
