റീ റിലീസിലൂടെ ബോക്സ് ഓഫീസിൽ വീണ്ടും വലിയ മുന്നേറ്റം നടത്തിയിരിക്കുകയാണ് മോഹൻലാൽ- രഞ്ജിത്ത് കൂട്ടുകെട്ടിൽ പുറത്തിറങ്ങിയ ‘രാവണപ്രഭു’. ആദ്യ ദിനം 70 ലക്ഷം രൂപയാണ് ചിത്രം നേടിയത്. നിരവധി ആരാധകരാണ് ഫാൻസ് ഷോ സംഘടിപ്പിച്ചും മറ്റും റീ റിലീസിനെ വലിയ രീതിയിൽ വരവേറ്റത്. അതേസമയം ചിത്രത്തിന്റെ റീ റിലീസ് പോസ്റ്ററിനെതിരെ രംഗത്തെത്തിയിരിക്കുകയാണ് ഗാന രചയിതാവ് മനു മഞ്ജിത്ത്. റീ റിലീസ് പോസ്റ്ററിൽ നിന്നും ചിത്രത്തിന്റെ ഗാന രചയിതാവായ ഗിരീഷ് പുത്തഞ്ചേരിയുടെ പേര് ഒഴിവാക്കിയതിനെതിരെയാണ് മനു മഞ്ജിത്ത് വിമർശനം ഉന്നയിച്ചത്.
ചില ഓർമ്മക്കുറവുകൾക്ക് പേര് ‘മറവി’ എന്നല്ല, ‘നന്ദികേട്’ എന്നാണെന്നും ഫേസ്ബുക്കിൽ പങ്കുവെച്ച കുറിപ്പിലൂടെ മനു മഞ്ജിത്ത് പറയുന്നു. പുതിയ 4K പതിപ്പിൻ്റെ പോസ്റ്ററിലേക്ക് പഴയ പേരുകൾ പകർത്തി എഴുതുമ്പോൾ അതിൽ ഗിരീഷ് പുത്തഞ്ചേരി എന്നൊരു പേര് ഒഴിവാക്കിക്കളയാനുള്ള ‘ധൈര്യം’ തോന്നിയത് ആർക്കാണെന്നറിയില്ല.
ഇപ്പോഴും തിയേറ്ററിൽ കേൾക്കുന്ന ആ കടലിരമ്പം ഉറഞ്ഞാടുമ്പോൾ ഉരുവിടുന്നത് കരിമേഘക്കെട്ടഴിഞ്ഞൊരാകാശക്കാവിലിന്ന് എന്നും… മഴക്കാറ് മായം കാട്ടും രാവാണേ എന്നും… ഉള്ളു വിങ്ങുന്നത് തുടിയായ് ഞാനുണരുമ്പോൾ ഇടനെഞ്ചിൽ നീയെന്നും ഒരു രുദ്രതാളമായ് ചേർന്നിരുന്നു എന്നും… വാർമൃദംഗാദി വാദ്യവൃന്ദങ്ങൾ വാനിലുയരുമ്പോൾ അതിനൊത്ത് പ്രണയിച്ചുമാണ്.
അതൊക്കെ സമ്മാനിച്ച പ്രതിഭാസം മരിച്ചു പോയെന്നേ ഉള്ളൂ. മറഞ്ഞു പോയിട്ടില്ല. പോവില്ല.ചില ഓർമ്മക്കുറവുകൾക്ക് പേര് ‘മറവി’ എന്നല്ല. ‘നന്ദികേട്’എന്നാണ് മനു മഞ്ജിത്ത് കുറിച്ചു.’
