തിരുവനന്തപുരം: ശബരിമല സ്വര്ണക്കൊള്ള കേസില് തന്ത്രി കണ്ഠര് രാജീവരുടെ അറസ്റ്റ് കേസില് നിന്ന് ശ്രദ്ധതിരിക്കാന് വേണ്ടിയാണോയെന്ന് സംശയമുണ്ടെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. സ്വര്ണക്കൊള്ളയ്ക്ക് പിന്നില് സിപിഎം-കോണ്ഗ്രസ് കുറുവ സംഘമാണെന്നും രാജീവ് ചന്ദ്രശേഖര് ആരോപിച്ചു.
‘കേസില് എന്തുകൊണ്ട് മന്ത്രിയെ അറസ്റ്റ് ചെയ്യുന്നില്ലെന്നതാണ് പ്രധാന ചോദ്യം. തന്ത്രിയെ അറസ്റ്റ് ചെയ്യുമ്പോള് എന്തുകൊണ്ട് മന്ത്രിയെ അറസ്റ്റ് ചെയ്യുന്നില്ല?
ശബരിമല സ്വര്ണക്കൊള്ളയ്ക്ക് പിന്നില് വലിയ രാഷ്ട്രീയക്കാരുണ്ട്. സിപിഎം-കോണ്ഗ്രസ് കുറുവ സംഘമാണ് പിന്നില്’ രാജീവ് ചന്ദ്രശേഖര് പറഞ്ഞു.
സ്വര്ണക്കൊള്ളയില് എല്ഡിഎഫിനും യുഡിഎഫിനുമെതിരായ സമരമെന്ന നിലയില് ജനുവരി 14ന് മകരവിളക്ക് ദിവസം വീട്ടിലും നാട്ടിലും അയ്യപ്പ ജ്യോതി തെളിയിക്കും. എന്ഡിഎയുടെ നേതൃത്വത്തില് പ്രതിഷേധത്തിന്റെ തുടക്കമായിരിക്കും ഇതെന്നും അദ്ദേഹം പറഞ്ഞു.
