കോട്ടയം ∙ 25 ഏക്കർ ഏറ്റെടുത്തു നൽകിയാ‍ൽ കോട്ടയത്തിനു നേരത്തേ അനുവദിച്ച കോച്ചിങ് ടെർമിനൽ യാഥാർഥ്യമാക്കാമെന്നു കേന്ദ്രമന്ത്രി ജോർജ് കുര്യൻ. കോട്ടയം രണ്ടാം പ്രവേശനകവാടത്തിലെ എസ്കലേറ്ററും ബുക്കിങ് ഓഫിസും ഉദ്ഘാടനം ചെയ്യുകയായിരുന്നു അദ്ദേഹം. 2011, 12 കാലത്ത് ബജറ്റിൽ പദ്ധതി അനുവദിച്ചതാണ്. എന്നാൽ സ്ഥലമേറ്റെടുപ്പിൽ അടക്കം കുടുങ്ങി പദ്ധതി നടപ്പായില്ല. ഇതിനൊപ്പം പ്രഖ്യാപിച്ച നേമം ടെർമിനലിന്റെ നിർമാണം തുടങ്ങി. പിറവം റോഡിനും ചങ്ങനാശേരിക്കും ഇടയിൽ എവിടെയെങ്കിലും സ്ഥലം ഏറ്റെടുത്താൽ പദ്ധതി യാഥാർഥ്യമാക്കാം. വന്ദേഭാരത് എക്സ്പ്രസുകൾ അടക്കം കോട്ടയത്ത് എത്തും. അമൃത് ഭാരത് സ്റ്റേഷനുകളും വരുമെന്നും അദ്ദേഹം പറഞ്ഞു.
