ന്യൂഡല്ഹി: ശബരിമല യുവതീപ്രവേശന വിധിയില് മാര്ച്ച് 14 ന് അകം സംസ്ഥാന സര്ക്കാര് അടക്കം കേസിലെ കക്ഷികള് വാദങ്ങളും നിലപാടുകളും രേഖാമൂലം അറിയിക്കണമെന്ന് സുപ്രീംകോടതി.
പുനഃപരിശോധനാ ഹര്ജി പരിഗണിക്കാനായി 9 അംഗ ഭരണഘടനാബെഞ്ച് രൂപീകരിക്കും. ഏപ്രില് 7 ന് കേസില് വാദം കേള്ക്കല് ആരംഭിക്കും. ഏപ്രില് 22 ന് വാദംകേള്ക്കല് പൂര്ത്തിയാക്കുമെന്നും ചീഫ് ജസ്റ്റിസ് സൂര്യകാന്ത് അറിയിച്ചു.
ഒമ്പത് അംഗ ഭരണഘടനാ ബെഞ്ചില് ഉള്പ്പെടുന്ന ജഡ്ജിമാരുടെ പട്ടിക ചീഫ് ജസ്റ്റിസ് അഡ്മിനിസ്ട്രേറ്റീവ് ഉത്തരവിലൂടെ അറിയിക്കും.ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല ബാഗ്ചി, വിപുല് എം പഞ്ചോളി എന്നിവരടങ്ങിയ മൂന്നംഗ ബെഞ്ചാണ് ഹര്ജികള് പരിഗണിച്ചത്.
ശബരിമല കോടതി വിധിയെ അനുകൂലിക്കുന്നവരുടെ വാദമാണ് ഏപ്രില് 7 മുതല് 9 വരെ നടക്കുക. തുടര്ന്ന് ഏപ്രില് 14 മുതല് 16 വരെ പുനഃപരിശോധനാ ഹര്ജിയെ പിന്തുണയ്ക്കുന്നവരുടെ വാദം കേള്ക്കുമെന്ന് ചീഫ് ജസ്റ്റിസ് അറിയിച്ചു.
