തിരുവനന്തപുരം: ഡിജിറ്റല്, സാങ്കേതിക സര്വകലാശാലകളിലെ വൈസ് ചാന്സലര് നിയമനത്തിലെ ഒത്തുതീര്പ്പില് സിപിഐഎമ്മിനുള്ളില് അഭിപ്രായ ഭിന്നതയെന്ന വാര്ത്ത തള്ളി എല്ഡിഎഫ് കണ്വീനര് ടി പി രാമകൃഷ്ണന്.
വിദ്യാര്ഥികള്ക്ക് വേണ്ടിയാണ് ഇത്തരമൊരു തീരുമാനത്തില് സര്ക്കാര് എത്തിയതെന്നും അതില് മുഖ്യമന്ത്രി വിമര്ശിക്കപ്പെടുന്നു എന്ന വാര്ത്ത തെറ്റെന്നും ടി പി രാമകൃഷ്ണന് മാധ്യമങ്ങളോട് പറഞ്ഞു.
കേരളത്തിന്റെ ഉന്നത വിദ്യാഭ്യാസ മേഖല വളരെ ഗൗരവമുള്ളതാണ്. ഈ മേഖല കാലങ്ങളായി സംഘര്ഷഭരിതമായി മുന്നോട്ടുപോകുന്നത് വിദ്യാര്ഥികള്ക്ക് സഹായകരമാകില്ല. സര്വകലാശാലകളില് ചില സാഹചര്യങ്ങളില് ചില പ്രശ്നങ്ങള് ഉയര്ന്നുവന്നു. അത് അവസാനിപ്പിക്കണം എന്ന നിലപാട് കോടതി ഉള്പ്പെടെ എടുത്തതാണ്.
ഇതിന്റെയെല്ലാം അടിസ്ഥാനത്തിലാണ് ഒത്തുതീര്പ്പിലെത്തിയതെന്ന് ടി പി രാമകൃഷ്ണന് വിശദീകരിച്ചു. ഇത് ഭരണപരമായ കാര്യമാണെന്നും അഭിപ്രായ ഭിന്നതയൊന്നും പാര്ട്ടിയിലില്ലെന്നും അദ്ദേഹം കൂട്ടിച്ചേര്ത്തു.
