കഞ്ചിക്കോട് ഐഐടി ക്യാമ്പസിനുള്ളിൽ നാലാം വർഷ വിദ്യാർത്ഥിനിക്ക് നേരെ അജ്ഞാതന്റെ ക്രൂരമായ ആക്രമണം. തമിഴ്നാട് സേലം സ്വദേശിനിയായ പെൺകുട്ടിക്കാണ് പരിക്കേറ്റത്.
ഇന്നലെ രാത്രി സുഹൃത്തുക്കൾക്കൊപ്പം ഡൈനിങ് ഹാളിലേക്ക് നടന്നു പോകുന്നതിനിടെയായിരുന്നു സംഭവം. അപ്രതീക്ഷിതമായെത്തിയ അക്രമി പെൺകുട്ടിയുടെ തലയ്ക്ക് അടിക്കുകയായിരുന്നു എന്നാണ് വിവരം.
പരിക്കേറ്റ വിദ്യാർത്ഥിനിയെ ഉടൻ തന്നെ കോയമ്പത്തൂരിലെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അജ്ഞാതനായ ഒരാളാണ് തന്നെ ആക്രമിച്ചതെന്ന് പെൺകുട്ടി പോലീസിന് മൊഴി നൽകിയിട്ടുണ്ട്.
സംഭവത്തിൽ കസബ പോലീസ് കേസെടുത്ത് വിശദമായ അന്വേഷണം ആരംഭിച്ചു. ക്യാമ്പസിനുള്ളിലെ സുരക്ഷാ വീഴ്ചയാണോ ഇത്തരമൊരു ആക്രമണത്തിന് വഴിവെച്ചതെന്ന് പോലീസ് പരിശോധിക്കുന്നുണ്ട്. അക്രമിയെ തിരിച്ചറിയുന്നതിനായി ക്യാമ്പസിനുള്ളിലെ സിസിടിവി ദൃശ്യങ്ങൾ പോലീസ് ശേഖരിച്ചുവരികയാണ്.
