തിരുവനന്തപുരം: മിനിമം വേതനം ഉള്പ്പെടെയുള്ള ആവശ്യങ്ങള് ചൂണ്ടിക്കാട്ടി സംസ്ഥാനത്തെ സ്വകാര്യ ആശുപത്രികളിലെ നഴ്സുമാര് പണിമുടക്കിലേക്ക്. നഴ്സുമാരുടെ സമ്പൂര്ണ പണിമുടക്ക് നാളെ ആരംഭിക്കും. മിനിമം വേതനം പുതുക്കി നിശ്ചയിക്കണമെന്ന ആവശ്യത്തില് സര്ക്കാരിന്റെ ഭാഗത്ത് നിന്നും അനുകൂല തീരുമാനം ഉണ്ടാകാത്ത സാഹചര്യത്തിലാണ് യുണൈറ്റഡ് നഴ്സസ് അസോസിയേഷന് സംസ്ഥാന വ്യാപകമായി സമരത്തിലേക്ക് നീങ്ങുന്നത്.
കേരളത്തിലെ ഏകദേശം 490 സ്വകാര്യ ആശുപത്രികളിലെ ആയിരക്കണക്കിന് നഴ്സുമാര് പണിമുടക്കില് പങ്കെടുക്കുമെന്ന് സംഘടന അറിയിച്ചു.
ചെറുകിട ക്ലിനിക്കുകള് മുതല് വന്കിട മള്ട്ടി സ്പെഷ്യാലിറ്റി ആശുപത്രികള് വരെയുള്ള 490 ഓളം സ്ഥാപനങ്ങളിലെ നഴ്സുമാര് ഡ്യൂട്ടി ബഹിഷ്കരിക്കും.
ഇതോടെ സംസ്ഥാനത്തെ സ്വകാര്യ ആശുപത്രികളുടെ പ്രവര്ത്തനം തടസ്സപ്പെടാനുള്ള സാധ്യത കൂടുതലാണ്. നഴ്സുമാര് കാലങ്ങളായി ഉന്നയിക്കുന്ന ആവശ്യങ്ങളില് സര്ക്കാര് മെല്ലെപ്പോക്ക് നയം തുടരുകയാണെന്നും അനിശ്ചിതകാല സമരമല്ലാതെ മറ്റ് വഴികളില്ലെന്നും യുഎന്എ നേതൃത്വം വ്യക്തമാക്കി.
