ന്യൂഡൽഹി∙ അടുത്ത വർഷം നിയമസഭാ തിരഞ്ഞെടുപ്പ് നടക്കാനിരിക്കെ കേരളം ഉൾപ്പെടെയുള്ള സംസ്ഥാനങ്ങളില് ബിഹാർ മാതൃകയിൽ വോട്ടർ പട്ടിക പരിഷ്കരണം (എസ്ഐആർ) നടപ്പാക്കണമെന്ന് ആവശ്യപ്പെട്ട് സുപ്രീംകോടതിയിൽ ഹർജി.
ബിജെപി നേതാവ് അശ്വനി ഉപാധ്യായ ആണ് ഹർജി സമർപ്പിച്ചിരിക്കുന്നത്. തിരഞ്ഞെടുപ്പ് പ്രക്രിയയെ ശുദ്ധീകരിക്കാൻ വോട്ടർ പട്ടികയുടെ പരിഷ്കരണം അനിവാര്യമാണെന്നു ഹർജിക്കാരൻ ചൂണ്ടിക്കാട്ടുന്നുണ്ട്. കേരളത്തിനു പുറമെ ബംഗാൾ, തമിഴ്നാട്, പുതുച്ചേരി, അസം എന്നിവിടങ്ങളിലെ വോട്ടർ പട്ടിക പരിഷ്കരിക്കണമെന്നാണ് ഹർജിയിലെ ആവശ്യം.
യഥാർഥ ഇന്ത്യൻ പൗരന്മാരെ മാത്രമേ വോട്ടർ പട്ടികയിൽ ചേർക്കുന്നുള്ളൂവെന്ന് ഉറപ്പാക്കാനും തിരഞ്ഞെടുപ്പ് പ്രക്രിയയുടെ സമഗ്രതയും പരിശുദ്ധിയും സംരക്ഷിക്കാനും വോട്ടർ പട്ടികയുടെ തീവ്രമായ പരിഷ്കരണം പരമപ്രധാനമാണെന്ന് ഹർജിയിൽ ചൂണ്ടിക്കാട്ടിയിട്ടുണ്ട്.
വോട്ടർ പട്ടികയുടെ തീവ്രമായ പരിഷ്കരണം ഇല്ലെങ്കിൽ അനധികൃത കുടിയേറ്റക്കാർ വോട്ടർ പട്ടികയിൽ തുടരുമെന്നും ഹർജിയിൽ പറയുന്നു.
