തിരുവനന്തപുരം: കേരളത്തിലെ ശിശുമരണനിരക്ക് അഞ്ചായി കുറഞ്ഞതായി ആരോഗ്യമന്ത്രി വീണാ ജോർജ്. ഇന്ത്യയിൽ ഏറ്റവും കുറഞ്ഞ ശിശുമരണനിരക്കാണ് കേരളത്തിന്റേത്. ദേശീയ ശരാശരി 25 ആണ്.
അമേരിക്കയുടെ ശിശുമരണനിരക്കായ 5.6നേക്കാൾ കുറവാണ് കേരളത്തിന്റേത്. സാമ്പിൾ രജിസ്ട്രേഷൻ സിസ്റ്റം (എസ്ആർഎസ്) സ്റ്റാറ്റിസ്റ്റിക്കൽ റിപ്പോർട്ടാണ് ഈ കണക്കുകൾ പുറത്തുവിട്ടതെന്ന് മന്ത്രി ഫെയ്സ്ബുക്ക് കുറിപ്പിൽ പറഞ്ഞു.
രാജ്യത്ത് ഗ്രാമീണ മേഖലകളിൽ ശിശുമരണനിരക്ക് 28 ഉം നഗരമേഖലകളിൽ 19 ഉം ആണെന്ന് റിപ്പോർട്ട് വ്യക്തമാക്കുന്നു. എന്നാൽ, കേരളത്തിൽ ഗ്രാമ-നഗര വ്യത്യാസമില്ലാതെ ശിശുമരണനിരക്ക് അഞ്ചായി നിലനിർത്താൻ കഴിഞ്ഞു. ഇത് ഗ്രാമ-നഗര മേഖലകളിൽ ഒരുപോലെ ആരോഗ്യസേവനങ്ങൾ ലഭ്യമാകുന്നതിന്റെ തെളിവാണെന്ന് മന്ത്രി വീണാ ജോർജ് പറഞ്ഞു.
ആരോഗ്യസേവനങ്ങളും പൊതുജനാരോഗ്യ പ്രവർത്തനങ്ങളും മികച്ച രീതിയിൽ നടത്തുന്നതിന് പ്രവർത്തിക്കുന്ന എല്ലാവർക്കും മന്ത്രി നന്ദി അറിയിച്ചു. ‘അക്ഷീണം പ്രവർത്തിക്കുകയും ഒപ്പം നിൽക്കുകയും ചെയ്യുന്ന എല്ലാ പ്രിയപ്പെട്ടവർക്കും നന്ദി,’ മന്ത്രി കുറിപ്പിൽ പറഞ്ഞു.
