ന്യൂഡൽഹി: ഒമ്പത് വർഷത്തിനിടെ ഫിഫാ റാംങ്കിംഗിൽ ഏറ്റവും മോശം അവസ്ഥയിൽ ഇന്ത്യൻ ഫുട്ബോൾ ടീം. പുതിയ റാങ്കിംഗിൽ ആറ് സ്ഥാനങ്ങൾ താഴേക്ക് പോയ ഇന്ത്യ 133-ാം സ്ഥാനത്തെത്തി.
ജൂണിൽ നടന്ന ഏഷ്യ കപ്പ് മത്സരങ്ങളിൽ വിയറ്റ്നാമിനോടും തായ്ലെൻഡിനോടും തുടർച്ചയായ തോൽവികൾ ഏറ്റുവാങ്ങേണ്ടി വന്നതാണ് റാങ്കിംഗിലെ ഇടിവിന് കാരണം.
2016 ഡിസംബറിൽ ഇന്ത്യ 135-ാം റാങ്കിലായിരുന്നതിനുശേഷം ഏറ്റവും താഴ്ന്ന നിലയാണ് ഇപ്പോൾ രേഖപ്പെടുത്തിയിരിക്കുന്നത്. 2024 ജൂലായിൽ കോച്ച് മനോലോ മാർക്വേസ് ചുമതലയേറ്റ ശേഷം എട്ട് മത്സരങ്ങളിൽ നിന്ന് ഒരു മത്സരം മാത്രമേ ഇന്ത്യ വിജയിച്ചിട്ടുള്ളൂ.
അർജന്റീനയാണ് റാങ്കിംഗിൽ മുൻപന്തിയിൽ നിൽക്കുന്നത്. തൊട്ടുപിന്നാലെ സ്പെയിൻ, ഫ്രാൻസ്, ഇംഗ്ലണ്ട്, ബ്രസീൽ, പോർച്ചുഗലും.1996ൽ 94-ാം സ്ഥാനം നിലനിർത്തിയതാണ് ഇന്ത്യയുടെ ഏറ്റവും മികച്ച റാങ്കിംഗ്. ഒക്ടോബറിൽ ഏഷ്യാ കപ്പ് യോഗ്യതാ മത്സരങ്ങളുടെ മൂന്നാം റൗണ്ടിൽ സിംഗപ്പൂരിനെതിരെയാണ് ഇന്ത്യയുടെ അടുത്ത അന്താരാഷ്ട്ര മത്സരം.
